خلاص إرتحت ... قتلت وفجّرت ... وفي بلدك حرقت ... إستنى ... عديت ضحاياك .... بيقولوا كام طفل .. على كام ست ... ويمكن كام راجل ولا مجند ... يا ترى فيهم ظابط ولا مفيش .. كام واحد كان سهران عشان إنت تعيش ...
بيقولوا أم الشهيد كانت بتزغرد .... إبني دخل الجنة بأمان .... وفي عز الزغرودة إتنفضت فجأة وقف لسانها وسكتت ... الصمت سكن قلبها للأبد .... روحها صعدت للي خلقها ... جريت ورا روح ابنها ... خدني معاك ... ما أنا اللي ربيتك وكبرتك ... عشان القاتل يحفر قبرك .... هتسيبني لوحدي لمين غيرك .... إوعى تكون زعلان مني ... أنا عارفة إني صحيتك ... قولتلك انزل بلدك عايزاك .... بس إوعى تتأخر ... مستنياك .... ما عرفتش إنك مش راجع .... وبدل ما أفرح ... قلبي إتملى بالمواجع .... قالولي إفرحي إبنك بطل .... مات وهو بيحرس بلده .... مات علشان لبّى الندا .... وبلده بحياته إفتدى ... بس أنا مقدرتش أكون لوحدي .... جيتلك علشان تونسني .... المرة دي هتفضل جنبي ..... وملايكة ربنا حارساك ....
سمعت الحكاية .... دي كانت أم الظابط ... طيب بتقول إنه كافر .... وقتل وخد رشوة وكان فاجر .... طيب والطفل والست والراجل .... كانوا فوق البيعة ولا كمالة عدد ... هي مصر بقى فاضل فيها كام ولد .... بقى إيه فيها مافيهوش لون الدم .... ومين فيها عايش من غير غم .... كل يوم والتاني قتيل .... طيب قوللي إنت فين الدليل .... إنت قلت إننا كافرين ولأسيادك جاحدين .... هما أسيادك بقوا الخلفاء الراشدين ... واللي يعارضهم يبقى كافر ومالهوش تمن في الدين .... قصدك كده تقهرني ... وتقتلني وتدمرني .... وتبيعها من غير تمن لإخوانك الجاحدين .... طيب خدها مني كلمة ... أقسم برب الدين .... رب العزة والكرامة وجميع المؤمنين ... ما تتهنا في يوم بيها .. بأرواحنا هنفديها ... دوّر على اللي هيطاطي ... عشان دمك رخيص واطي ... وفي مكانك يا كل شهيد .... بيتولد دم جديد .... هيكمل المشوار .... وحياة دمك يا ولدي .... وحياة ترابك يا بلدي .... حالفين هناخد التار ... بإذن الواحد القهار ... ونصونك ليوم الدين ... من العدا والمأجورين .... فاكر إنك بتقتل فرحتي .... ومني هتسرق دنيتي .... أنا يا ابني عايش بطل ... وإن مت ... بأموت شهيد ... تزفني الملايكة ... وأمي لشمعي تقيد .... في الدنيا مقامي عالي ... وفي آخرتي مقامي أعلى ... بس انت مقامك فين .... هو أصلا ليك مقام .... إنت آخرك كده تطاطي ... على إيد المجرم الواطي ... اللي بيك وبغيرك بيتاجر .... ومالوش أمان ولا دين .... الرب عندي رب سلام ... أنا ربي اسمه الرحمن .... يرحم ويغفر ويسامح ... قالها من فوق سبع سموات .... طمن جميع المظلومين .... لأنصرنه ولو بعد حين .... هتقدر تكدّب ربنا ... ومننا هتاخد حقنا .... دوّر لك على بلد غيرها .... ما تاخدش منها ومن خيرها ..... يحرم عليك ترابها وبحرها ونيلها .... روح للي مستني ياخد خيرها ... مستني في يوم يميلها .... فاكر يقدر يوقعها .... أبدا وحياة اللي زرعها .... وعمّرها ونمّاها ..... ما تمِسوا شعرة منها وقُدرة ربي حامياها ....
( إنا لله وإنا إليه راجعون ) ...
( ولا تحسبن الذين قتلوا في سبيل الله أمواتا بل أحياء عند ربهم يرزقون )
صدق الله العظيم
جيهان أدهم
تشعر بـ
.jpg)
.jpg)
تشعر بـالحنين..jpg)